بكري محذرا الحكومة: ليه بنتصور أن الشعب مش هيتكلم؟ (فيديو)

أكد الإعلامي مصطفى بكري، أن الشعب المصري يعاني من الأوضاع الاقتصادية الحالية، مشيرًا إلى أنه يجب على الحكومة الجديدة أن تأخذ ذلك في الاعتبار.

وقال بكري خلال برنامج 'حقائق وأسرار' المذاع على قناة 'صدى البلد': 'الناس حاسة بالأوضاع، الدكتور مصطفى مدبولي بذل جهد كبير الفترة اللي فاتت ولما جه في المرة التانية كثيرين قالوا طيب ليه ما نجيب حكومة جديدة ولكن الرئيس له فلسفة في هذا الأمر أن يستكمل المشروع الوطني وأن الملفات اللي حاطط الدكتور مصطفى إيده فيها ولسه مخلصتش وأن الوقت لا يسع'.

وأضاف: 'لازم الحكومة الجديدة تعرف أن في مطالب للشعب المصري وأن الناس تعبانة جدًا وأن غلاء الأسعار ألهب أظهر الناس واستثماريًا محققناش الهدف اللي قال عليه الرئيس عبد الفتاح السيسي'.

وتابع: 'في أوضاع صعبة في العالم كله وبتنعكس علينا ولكن إحنا كمان غلابة وعندنا فئات تحت خط الفقر والتضخم وصل إلى 36% والناس تعبانة طيب يا حكومة هتعملي إيه في الفترة الجاية؟ نبقى زي المنهج اللي فات ولا عندنا محددات اتكلم عليها الرئيس ويجب الالتزام بها، علينا كحكومة أن نشوف حالة الناس الغلابة والطبقة المتوسطة راحت فين'.

وأكمل: 'بالذمة مكناش نقدر نجيب 14 مليار جنيه من أي حته ونسيب العيش لمدة سنة؟ مكانش ممكن نعمل ده ليه بنصدر احتقان ليه بنتصور أن الشعب ده خلاص يعني مش هيتكلم ولا يضج إيه الثقة الزائدة عن الحد دي؟ يا جماعة حافظوا على سلامة النظام الوطني، حافظوا على الراجل اللي بيشتغل ليلًا نهارًا من أجل البلد ولما تقدموا تقارير قدموا تقارير صح وشوفوا فقه الأولويات الشعب المصري مستحمل والرئيس أشاد بصمود الشعب المصري بس إلى متى'.

وأوضح: 'لية بتوقعونا في مشاكل وكل يوم نكتشف فساد هنا وهنا والدنيا مولعة في كل حتة، ليه مبناخدش بتقارير الجهاز المركزي للمحاسبات ونحاسب الفاسدين، لازم نحافظ على سلامة البلد دي أمنها القومي مسؤولية كل المصريين'.

واختتم: 'الأمن والاستقرار، وأنا بشيد باللي عملته الشرطة الفترة اللي فاتت بقيادة الوزير محمود توفيق، وهو أمر يستحق كل التقدير ومحدش يقدر ينكر'.